高鐵香港段今天正式投入服務，經歷波折終於開通，難怪特首林鄭月娥連日都將呢條「鐵」掛在口邊，佢今朝出席團結香港基金舉辦嘅創科展覽致辭時亦再sell鐵，讚高鐵香港段將香港聯繫到超過2萬5千公里嘅高鐵網絡，令香港進入以高鐵出行嘅新生活模式，拉近香港同內地好多城市嘅距離，尤其係粵港澳大灣區，令人覺得好興奮。

估唔到呢架「動感號」都令中國國家科技部部長王志剛蠢蠢欲動，林鄭透露王志剛都會坐高鐵離開香港去廣州開會，同港人一齊分享香港進入國家高鐵網絡嘅興奮喎。

講返創返，林鄭都不忘再自誇，話去年施政報告提出香港喺科技創新有8大工作方向要點，雖然距離報告出爐未到一年，但已有一定成效，又指過去一年同內地及海外嘅科技官員、機構同企業舉行咗接近卅次會議，訪問咗內地同海外機構約30次、出席咗40個科創活動，相信自己嘅努力，會有回報喎。嘩，講到巴閉咁噃？乜大家仲未適應林鄭style咩？

立會補選新聞，《蘋果》一網睇晒
http://bit.ly/appledaily1125