今年韓國電影圈都幾熱鬧，當中有唔少電影叫又叫座，而下周三仲有壓軸韓片《與神同行》上映，唔知可唔可以趁聖誕檔期創票房佳績？

而根據電影振興委員會就今年頭10個月上映嘅韓片作出統計，單是頭10個月就有468部韓片上映，累計觀影人次超過9,869萬名觀眾，觀眾佔有率有49%。

至於今年最多觀眾捧場嘅韓片就屬於宋康昊、劉海鎮、柳俊烈等主演嘅《逆權司機》，有逾1,200萬觀眾人次，亦係今年唯一一部電影破千萬人次。第二位為玄彬同劉海鎮主演嘅《秘密任務》，有逾781觀影人次、第三位為宋仲基、黃政民、蘇志燮等主演嘅《軍艦島》，有逾658萬觀影人次、第四位為馬東石及尹啟相主演嘅《犯罪都市》，有逾596萬觀影人次、第五位為朴敘俊及姜河那主演嘅《青年警察》，有逾563萬觀影人次、第六位為趙寅成同鄭雨盛主演嘅《The King》，有逾531萬觀影人次、第七位為李秉憲同金允錫主演嘅《南漢山城》，有逾381萬觀影人次、第八位為羅文姬同李帝勳主演嘅《不能說的故事…》，有逾326萬觀影人次、第九位為韓石圭及金來沅主演嘅《監獄》，有逾293萬觀影人次、第十位為薛景求同金南佶主演嘅《殺人者的記憶法》，有逾265萬觀影人次。

雖然宋康昊主演嘅《逆權司機》暫時成為票房冠軍，但講到今年嘅票房之王宋康昊都只係可以進佔第八位，而「票房之王」係統計有份參演今年電影嘅演員，當中無論擔正或是配角都會計埋，而最終得冠軍就係有份主演《逆權司機》、《The King》、《被操縱的城市》及《犯罪都市》嘅崔奎華，合共吸引逾2,589萬觀眾。

第二名至第十名就分別為李靜恩、劉海鎮、陳善圭、趙宇鎮、許成泰、全慧珍、宋康昊、玄彬及金素貞。

更多韓流，喺晒《娛果》
http://fb.com/appledailyent