李八方online︱備戰「跑馬仔」？梁振英拜訪錫克廟捐款
蘋果日報 2021/05/31 22:09
李八方online梁振英錫克廟毛漢
前特首梁振英前往拜訪錫克廟兼捐款。
特首選戰角力持續，政界盛傳有意再競逐特首之位嘅前特首梁振英除咗頻頻批評現任特首林鄭月娥嘅政策，亦積極爭取曝光率。曾經响反修例示威中不幸被水炮車射中嘅香港印度協會前主席毛漢，早前發起籌款活動，希望籌款300萬元購買醫療設備送去印度幫幫同鄉。毛漢今日向傳媒透露，梁振英（CY）今日拜訪咗錫克廟，向佢哋送上捐款支票，但未有透露捐款金額。
近日同林鄭「唇槍舌劍」嘅CY，今日去咗拜訪錫克廟。毛漢提供圖片
林鄭有冇份？ 毛漢：求之不得
毛漢仲引述CY話，高度評價佢哋嘅籌款活動，呼籲香港市民可以以行動支持，佢仲透露，CY開到聲話佢响內地認識唔少供應商，如果毛漢購買醫療物資有困難，佢可以幫忙添。
除咗CY，其實早幾個星期前特首曾蔭權都到訪錫克廟捐錢，毛漢透露2名前特首都係佢以私人形式邀請捐款，佢仲打算邀請另一前特首董建華來幫幫印度同鄉，至於現任特首林鄭月娥有冇份？毛漢就話如果林太肯嚟，佢梗係求之不得啦。
梁振英同錫克教教徒坐低傾偈。毛漢提供圖片
梁振英向錫克廟送上捐款支票。毛漢提供圖片
-----------------------------