調查話多咗後生仔學人炒股，華華喺網上討論區亦都經常見到好多新手，問人炒股意見，佢哋好多都係抱住短炒心態。
好似新手Carmen_bluesky就話：「只係想短線，搵少少就放，賺吓啲使費咋！」SCK杰更加連公司點解派息都搞唔清楚，「聽講話股票有時會派股息㗎喎，通常點樣先至會派？」
新還新，但今年大牛市，唔少股場新仔都比老手賺得多，C71就話：「識得個朋友，連新股都未抽過，就入咗幾萬蚊call輪，又真係俾佢賺到。」炒股剛好一年嘅Michristian就決定暫時收山，「呢年炒股好好彩，遇到牛市，啲股票賺咗七成，但炒股實在太攰喇！要花好多時間研究股票、睇公司業績、評級報告、做技術分析同睇財經新聞，成日活喺貪心同恐懼之間，冇晒私人時間。」
當然，亦有初哥損手爛腳，Luluhk話，「玩咗股票冇耐，就輸咗八成，𠵱家都仲未賺番，好肉痛。」Psplayer就講：「自己未親身見過股災，炒股都會好驚，所以家陣開始減持股票，鎖定利潤先。」