【新增動新聞】
鍾意睇《男兒當入樽》嘅少男，夢想應該係搵到一個好似晴子小姐嘅女人，唔知睇完呢段片，你會唔會有少少心動呢？FIBA三人籃球U18世界盃正喺中國成都進行得如火如荼，其中日本女籃喺周四雖然以15:21輸畀美國女籃，兩戰一勝一負暫時排A組第3，但陣中16歲小將高橋玲那（Takahashi Rena）面對高成個頭嘅對手毫無懼色，頻頻鏟籃得分，仲當選為全日MVP，雖然短髮look同晴子小姐唔算似，但有網民睇完全日精華都大讚佢「卡娃伊呢」！

介紹番，高橋玲那身高1米62、體重57公斤，目前就讀大阪薰英女學院高等學校，佢早前接受日本傳媒訪問時，就話好享受三人籃球帶來嘅迅速變化，自己打法亦傾向以後衛身份指揮隊友同鏟籃進攻咁話。雖然日本餘下兩場分組賽要面對種籽排名比自己高嘅澳洲同匈牙利，但球隊喺高橋玲那領軍下一定唔會放棄嘅，奸爸爹！