今日是初七「人日」，人人都生日，馬年大家都希望行好運，眾星甄子丹、吳君如、許志安、吳奇隆等，也齊來寫馬年揮春，祝願大家龍馬精神、馬到功成；就連鬼妹仔薛凱琪也來湊熱鬧學寫揮春，馬年新一年，大家更一起許下新年願望。
撰文：溫敏芝
攝影：仇志德、黃偉雄、黃文偉

甄子丹多點好事

「我希望香港多啲好事，世界少啲災難。」

許志安有新發展

「啱啱簽咗新公司，希望新一年歌曲同電影都有新發展，樣樣都好。」

吳君如一雞獨大

「希望金雞一雞獨大，父母身體健康，個女讀書叻，老師唔好成日投訴我唔記得寫回條啦，哈哈。」

薛凱琪唱片大賣

「希望屋企人，屋企兩隻貓都開心，我嘅十年大碟繼續大賣，希望我識嘅所有人都健康開心。」

鄧麗欣工作突破

「希望身體健康，簽咗新公司後，大家合作愉快，新一年工作有突破，拍多啲好戲，工作順利啦。」

吳奇隆事業向上

「希望新公司事業蒸蒸日上，工作順利，同埋身體健康。」

陳奐仁頻頻接Job

「希望有咗新studio，多啲歌手搵我做歌做曲做監製，更多人搵我拍戲。」

姜麗文開心要緊

「希望大家快啲睇到港視劇集，繼續支持我嘅音樂，開心最緊要。」

森美知足常樂

「今年事事感恩、知足，就全年快樂喇。」

黃美棋順利賺錢

「希望馬年事事順利，我自己就希望拍多啲廣告，電視同電影，搵多啲。」

雨僑考牌買車

「希望可以考番個車牌買車，今年出到兩張碟，音樂上有代表作。」