Robynn & Kendy、菊梓喬、劉卓軒噚晚喺灣仔舉行音樂會，Robynn & Kendy話舊年開騷時撞正新城頒獎禮，今年唔再撞期可以出席所有頒獎禮，明年會出新專輯。Robynn喺年中時宣佈同拍拖8年圈外男友訂婚，婚禮就安排喺明年舉行，問到婚禮日期，Robynn話因為爸爸想低調，所以唔想公開：「婚期殺到埋身，籌備得如火如荼，至於幾時結，我想發生咗至講，家人同我都想低調，所以結完至同大家講。」至於好拍檔Kendy就會係姊妹團其中一員，Robynn笑話：「佢好多鬼主意，班兄弟就交畀佢，真係難為咗班兄弟。」

另外，上年《勁歌》總選，菊梓喬成為大贏家，問到今年想同公司講要幾多個獎？佢話：「我最想身體健康，開心最重要，獎項平常心。」

精選娛聞，喺晒《娛果》
http://fb.com/appledailyent