新一屆議員下周三宣誓就職，到時嘅公民黨飛機師譚文豪Jeremy就會更加貼地咯！原來成功喺九龍東接棒嘅Jeremy，星期六揸埋最後一轉空中巴士後，就會調任空勤人員管理工作，之後4年唔會揸飛機，唔會再似以前咁離地。
Jeremy話呀，調職後收入有所減少，而要減少揸最愛嘅飛機都有啲sad㗎，但必須履行選舉承諾，專注立法會工作。佢話調職後大部份時間會留喺香港，未來有時間可能會考教官牌，唔收錢教青少年駕駛小型飛機，當係回饋社會又過吓飛行癮。嘩，幫年輕人衝上雲霄，佢會唔會型過Sam哥？
Jeremy預告嚟緊會加入立法會交通、房屋、工務、政制同發展小組，亦會爭取加入議員酬金及工作開支償還款額小組委員會，當然會跟進廉署高層變動、黃之鋒被拒入境泰國同空管系統等事務。