政協提案呢家嘢，認真你就輸！《文匯報》噚日報道，一班港區全國政協委員今年兩會期間，聯名向全國政協提交咗一個名為《關於確定中式禮服作為「國服」的建議》嘅提案，倡議制訂統一嘅中式服裝作為現代中國國服，仲想將大年初一定為「國服日」。為乜忽然關心起時裝？據報係要藉此復興中華傳統文化、配合大國崛起展示軟實力喎。
牽頭提案嘅人係邊位，竟然獲《文匯報》大篇幅報道？哦，原來係香港《文匯報》社長王樹成，而參與聯名嘅港區委員包括民建聯主席譚耀宗、「新賭王」呂志和公子呂耀東及立法會前議員霍震霆等。報道引述王樹成話，禮服係軟實力嘅象徵，家陣中國崛起，若然中國仲以西服作為禮服係唔適合，佢咁講：「當然不能完全說西裝就是西方文化殖民的象徵，但不可否認的是，西裝是伴隨着隆隆炮聲傳入中國的。」

倡年初一定為「國服日」

為咗洗脫恥辱，王樹成認為要制訂統一嘅中式服裝作為現代中國嘅國服，又話國服一旦確定，領導人同各級領導幹部都應該帶頭着，仲要將年初一定為「國服日」。不過提案冇同時提出「國服」款式，八方想像唔到譚耀宗同汪明荃等政協，分別着老夫子裝同埋cosplay倩女，喺人民大會堂開會嘅情景。
時裝設計師鄧達智都有留意呢單新聞，佢細數中國歷代服飾，舉例指中山裝同唐裝都唔係漢服，例如中山裝由日本服演變，唐裝就係滿族衫嚟嘅，佢認同中國可以有一套有代表性嘅國服，但唔覺得因為大國崛起，就要唔着西裝。鄧達智建議國服可以中西合璧，例如將中山裝粒鈕改咗做滿洲服嘅盤扣，布料亦可以改良，強調着衫最緊要方便簡潔兼舒適。

李八方
mailto:[email protected]