莫少聰上個月喺北京涉吸毒被捕，前日凌晨佢已經放返出嚟喇。有消息話日內佢會開認錯記者會，同大家交代呢件事。
莫少聰經理人張國忠噚日喺電話度話：「聰仔已經同我通過電話，佢心情都唔係咁好，不過事情已經發生咗，佢都好懺悔，以後惟有小心啲，聰仔日內會喺北京交代事件。」
聰仔嘅助手嘉慧話：「聰仔3號（即明日）會喺北京接受新浪網獨家訪問，之後先會度期返嚟香港開記者會。」

傳孫興拘留多5日

莫少聰噚日一早再上微博留言冧粉絲，佢話：「昨晚一直把所有你們對我說的話看完。讓我一次又一次的感動。真的十分感謝我的寶寶們。是你們給了我很大的力量，最後我要很大很大聲的說：『我愛你們耶。』」粉絲睇完肯定心甜啦！
此外，孫興除承認吸毒5年，又被揭涉藏毒，有傳會拘留多5日，即係一共19日，然後先送去戒毒所戒毒。聽講戒毒所設備好似醫院，家屬可以探望，兩個人同住一房，房中設備較拘留所好，但冇獨立洗手間，病人雖受監管，但可以健身或打籃球，膳食要自費。病人戒毒期由幾日至兩年不等，如果兩年後表現未如理想或再加長一年。