由楊真鑒監製、張鵬執導、梁家輝、劉嘉玲、吳磊、明道主演嘅新片《阿修羅》，今日喺灣仔舉行預告片發佈會，家輝透露喺戲中，同嘉玲及吳磊合演三為一體嘅阿修羅王，嘉玲表示很有難度，因為要按照家輝嘅動作去演，如家輝抬頭，嘉玲同吳磊就要低頭，做出相反動作，由於係分開拍攝，所以當家輝拍完一個鏡頭，佢就幫手移動嘉玲身體以協助佢去演。司儀陳芷菁笑問家輝咪摸勻嘉玲全身？家輝話：「移動同摸係兩回事，唔好諗太多。」隨後家輝大玩難gag表示：「我係阿修羅王，呢部戲入面有六個境界，我係其中一代嘅王，我要打天，但係香港已經有四大天王，所以我要做天王之王，就係電影帶出嚟嘅訊息。」

嘉玲表示喺戲中冇戲服着，家輝以國語笑住話：「光着身子，因為預算已放在特技上，所以沒有戲服給她穿！是露點的那種，其實是追蹤點衣服。」事後嘉玲解釋係特技衫：「雖然好貼身，但好舒服，不過頭盔有幾磅重，但ok嘅，相比徐克嘅《武則天》已經好簡單，同埋係荷李活特技度身訂造，所以帶起上嚟唔會頭痛。」講到家輝要移動佢嘅身體，嘉玲笑指係一個幾好經驗，不過演起上嚟就較為困難，要靠幻想。講到佢嘅作品都有難度？嘉玲話：「咁先好玩，如果唔難就冇進步。」

嘉玲透露現時已放完假，要全身投入工作，佢話：「滑雪10日，唔夠皮㗎，不過唔可以咁樣，要平衡番，冇梁生（梁朝偉）咁佗佻，咁hea，佢仲放緊假，大家性格唔同。」嘉玲還指現時要準備7月嘅舞台劇。

精選娛聞，喺晒《娛果》
http://fb.com/appledailyent