賭王千金何超盈決心做女強人，今日喺澳門搞咗個「何鴻燊藝術獎頒獎禮」兼拍賣，母親四太梁安琪，細佬猷君當然有撐場，另外佢嘅朋友好似林心兒，仲有八姑娘何婉鴻及伍詠薇等人都有出席。

超盈同猷君齊齊到場，佢哋透露今日拍賣成績有2億4千6百萬，超盈話比預期中好:「但都有待進步，始終第一次，希望可以一年做一次。」問猷君係咪要同家姐學嘢?佢話:「我以家姐為榮。」媽咪梁安琪有冇讚家姐?佢話:「媽咪都好Surprise，其實第一次都係抱住唔好蝕心態，冇諗賺到錢。」

問到猷君嘅新女友Kimmy?佢就甜笑話:「都係剛剛喺新加坡返。」佢就病咗所以聲沙沙，超盈話:「本來Kimmy都嚟，但佢爸爸有慈善活動。」猷君就話:「不過佢都有SendMessage俾家姐。」問佢同女友係咪好Sweet，佢就報以甜笑。

超盈在旁話:「好戥佢開心，係好好嘅女朋友，佢哋係因為我先識。」算係媒人?佢話:「我知道後都好驚訝。」問猷君拍拖係咪第一個話家姐知?佢話:「係嘅，佢哋係朋友，問左佢批準先。」媽咪有咩comment?佢就話仲未見面:「我哋去咗澳洲先，我去到時先同佢解釋。」媽咪有冇嬲?佢話:「冇，佢好開心。」覺得Kimmy點，猷君話:「覺得佢係夢寐以求，係男仔都想追到嘅女仔。」係咪結婚對象?佢話:「我得20歲，過2日先生日。」女友幫搞生日paryt?猷君又再甜笑，問到生日願望，佢話:「希望屋企人身體健康，有家姐咁成功。」

講到舊愛Yumi好似成日喺網上贈慶，猷君就立即有啲唔開心想放低咪走人嘅樣，超盈就幫細佬答:「我覺得男仔對感情係有風度，唔應該Comment咁多，要Gentleman，要顧及o依家嗰個嘅感受。」猷君就喺旁邊係咁點頭好同意咁。