唐寧、陳家樂、余香凝、蔡瀚億等,今日喺跑馬地為港台劇集《總有出頭天》開工,拍攝一場陳家樂雨中向劇中女友余香凝求婚嘅戲份。
唐寧o依家懷孕5個月,被追問今胎係仔定女﹖佢就大賣關子話:「就嚟會講,知咗喇。」是否佢心水﹖唐寧笑言:「係唔係都開心。」佢話呢套劇已完成拍攝佢嘅部份,之後會選擇輕鬆工作去做。
家樂表示場求婚戲係同導演一齊諗,問佢有冇求婚對象﹖佢話:「未求住,做嘢搵多啲錢先,因為好想快啲買樓,如果再唔買畀阿媽,佢就唔畀我做,叫我退出娛樂圈,因為入咗行一段日子,收入只係夠自己,同埋畀少少屋企,但儲唔到一筆錢買樓,o依家27歲,30而立,所以我要努力啲。」