馬浚偉曾經以「緣薄」嚟形容同無綫高層樂易玲嘅關係，今日馬仔正式喺商台開咪主持節目《偶然馬浚偉》，首集嘅嘉賓就係呢位好緣薄嘅樂小姐。

2012年，馬浚偉喺無綫完成劇集《當旺爸爸》後，就向樂易玲提前解約，結束18年嘅賓主關係。

冰封三尺非一日之寒，馬仔要提前離開大台，原來係不滿大台替佢推掉大陸劇，錢搵少咗之餘，仲要受到冷待，當年佢接受專訪時，被問到係咪受到打壓？馬仔好坦白話叫佢答「冇」，佢真係答唔出口，馬仔話公司唔需要為佢特別做啲乜，但至少要公平啲！再追問到佢同樂小姐不和一事，佢就用「緣薄」嚟形容二人關係，話同樂小姐溝通唔到，久而久之就疏遠了。

為咗省靚個招牌，陳志雲之前曾提議馬仔請不和嘅樂小姐做嘉賓( 新聞連結： http://bit.ly/2etV9IV )，今日馬仔真係請咗同佢不和嘅樂易玲做嘉賓，打響頭炮，馬仔就話佢哋嘅恩怨早已化解：「兩年前我哋已經破左冰，係外界唔知道啫。」提到當年不和的事，樂易玲指馬浚偉用「緣薄」形容很優雅：「我都冇諗過當年緣薄得咁交關。」

講到點樣破冰，原來係關梁乃鵬嘅事，馬仔話早於梁乃鵬飯局中冰釋前嫌，樂小姐就話佢哋係教會嘅弟兄姊妹，o依家比以前更親近。馬仔話：「節目入面，我哋都講返件事，樂小姐話我生性、冇事冇幹所以唔使理我，但人係會呷醋㗎嘛？」問到樂小姐可會重新簽馬浚偉做親生仔？佢笑住話：「我驚簽唔到喎，不過合作有好多方式嘅。」馬仔聽到就打蛇隨棍上話歡迎樂小姐請佢拍電影，仲話唔介意再為無線拍劇。

至於當年拒合照一事，馬仔話當年趕住錄宣傳片，並唔係故意唔同樂小姐合照喎！