噚日睇電視直播記者招待會，真係一股清新嘅凉風。不過同大家講凉風之前要鬧吓啲政府官員。
禮拜三嘅《金手指》，已經話到明泰國曼谷機場事件冇咗嘅話，下一個政治爆發點一定係啲因「短加長減」收費改動，而非常勞氣嘅的士司機。最後搞到的士圍堵機場，交通癱瘓。
最可悲係引爆點居然係一張解釋新收費嘅小冊子，喺曼谷機場，政府錯在對旅客要嘅資訊唔夠流通；喺特區機場，唔通錯在資訊太過流通？一張解釋新政策嘅小冊子，引發咁大反應，都係對新政策嘅一個判刑。
講番嗰股清新嘅凉風。噚日睇亞洲電視新任執行主席張永霖，同CEO王維基嘅記者招待會，真係好耐未睇過咁真心實意嘅對答。兩個人赤裸裸喺鏡頭同記者前，講佢哋嘅憂慮同期望。
張永霖一開波就話冇商業機構可以頂得順長期不斷蝕錢。記者們聽到「蝕錢」，就會反射式得一個結論：「裁員呀！裁員呀！」王維基嘅答案就係嗰股清新嘅凉風，冇公關化妝嘅惡臭。