現年36歲的官恩娜（Ella）前日在港島區某醫院剖腹誕下6.7磅混血男B，法籍老公Juan-Domingo Maurellet親手為兒子剪臍帶，囝囝改名為Gabriel-Antonio Maurellet。初為人母的Ella心情喜悅，昨日公開囝囝的腳仔相，着住白色BB袍的腳仔長長，腳趾圓渾好可愛。
Ella於今年2月秘嫁細自己3年的法籍醫生Domingo，4月就宣佈已懷胎3個月，大前日傳出Ella的B仔已出世，她即在社交網貼大肚相澄清：「唔知邊個咁大整蠱，四圍同人講我今日生咗！個個打嚟恭喜我！搞到我今日乜都做唔到不停要覆短訊同電話解釋……笑死！」

「傷口唔痛」

怎知事隔一日，Ella前天已秘密在醫院剖腹生B仔，昨日才透過唱片公司公告喜訊，Ella說：「我同老公都好感動，非常好彩傷口完全唔覺得痛，囝囝暫時未見到似自己定老公，但呢刻BB嘅手手腳腳就比較似我。」問到餵人奶的感覺，她說：「唔知應該點樣形容，但BB非常合作，自己同老公嘅家人都陪住我，覺得好開心，希望囝囝可以健康快樂成長。」
同公司的周柏豪透過電話恭喜Ella：「祝Ella同佢老公、BB健康開心快樂咁生活，知道BB剛剛出世，係一件非常開心幸福嘅事，大家都戥佢哋一家人高興。」連詩雅則叮囑Ella：「休息多啲，辛苦晒，恭喜晒，希望小朋友肥肥白白健健康康。」
此外，台灣樂團蘇打綠鼓手小威（史俊威）亦榮升父親，前晚小威在微博上載與太太Sunny抱住初生男B照片，並報喜：「Sean，感謝上帝帶你來到我們生命中，爸爸媽媽永遠愛你。」太太也開心表示：「有你這個小情人陪我，一切都值得了！也謝謝爸爸的陪伴。」
採訪：皓騫