夠Car事：
神奈川獨家直擊　科幻王側側膊過彎

蘋果日報 2009/10/28 00:00

東京車展一如所料，環保大晒，但玩到好似日產架LandGlider咁出位，又真係令人對電能車另眼相看。呢架科幻之王唔係一味揸住數字齋吹，今日就帶大家直擊平塚市記招，聽吓乜嘢叫3D揸法，跟手睇埋全港首度曝光嘅開發原型。

記者、攝影：徐影龍
鳴謝：NissanHK
動感揸法3D變4D
繼去完橫須賀GRANDRIVE試架TiidaEV後，今日再度踏足神奈川另一邊嘅平塚市，實地睇吓架LandGlider開發原型（Prototype），兼且聽埋開發團隊有咩講。記招上一大堆電能推動有零污染嘅好處，我都聽唔入耳，心入面只不住期待LandGlider嘅來臨。講者賣完關子，終於開始講架科幻王，仲話佢開創咗新嘅三維揸法，坐同揸都有與別不同嘅體驗。計我話點只3D揸法，LandGlider用到傾側車身同改變重心嚟轉彎，入彎時個人要「側側膊」，已經達到體感式嘅4D玩法，轉彎半徑拍住電單車咁細，仲要話任何速度均可作最大17度傾斜，就算髮夾彎幾急幾密，一樣輕易就過到，有晒電單車嗰種超靈活優勢。
最重要係LandGlider個繭形座艙，超硬車身＋強化纖維玻璃，點都安全穩陣過「皮包鐵」。加上外形超級科幻靚仔，揸落旺區兜番轉，吸引力點都大過嗰班死氣狂噴嘅「天若有情」啩？
empty
■開發團隊話LandGlider有3D揸法，計我話瞓晒身咁壓車過彎先最好玩。
empty
■位於神奈川平塚市美術館，專登休館搞日產記招。
empty
■中東、杜拜傳媒對LandGlider好有興趣，問個不亦樂乎。
1.前望似架瘦身咗嘅私家車，科幻味極濃。
empty
2.尾部設計最天馬行空，下方好大機會係電摩打，即係未必有尾箱。
empty
3.左右轆都可升降，令到車身可作17度傾側，壓車入彎特別靈活。
empty
開發原型首度曝光
LandGlider外形似私家車混合電單車，但內櫳卻似足飛機艙，由木製原型展品中已望到，踢走傳統圓碌碌軚盤，改為雙桿式飛機操控，加埋1＋1前後式座椅，以及頭頂巨型天幕玻璃頂，仲唔係儼如一架F14噴射機設計？
咪睇佢後座逼逼狹狹好似無乜位，據在東京車展中實地試坐經驗，LandGlider軸距達到2,180mm，坐兩個人絕對綽綽有餘，只係轉彎時車身會傾側，為求穩住乘客，所以椅背刻意拉斜，坐後面其實一啲都唔辛苦。而且睇番架開發原型本身係不設後座，斷估日產未來大可將之改裝成客貨兩用，拍低椅背或加塊板擋隔，就變成第二尾廂，實用性相當之高。
empty
■LandGlider展區唔大，但擺咗部噴咗一半銀色嘅開發原型喺度。
原型
最搶眼雙桿式操控，似揸戰機多過揸車。
empty
雖未有後座，但有潛力發展成實用尾廂。
empty
實物
包上皮革、屏幕及風口位，成架靚仔晒。
empty
全皮櫳加地毯，仲有類似四點式安全帶。
empty
睇盡日產靚車
今次日產揀咗平塚市美術館搞記招，其實係畀記者參觀埋「Nissan熱情與機能之美」展覽會，入面由Datsun（日產前身）古董車112型，到未來概念車PIVO都有。雖然場館細細，擺嘅大部份都係細比例模型車，不過一次睇晒近百架有標誌性嘅汽車模型同資料，有如上咗堂日產汽車發展史嘅堂，總算大開眼界。
empty
■老過你同我嘅Datsun老爺車，全原廠超新淨，古董迷肯定流口水。
基本上日產由1940開始，無停過咁研發電能概念車。

網址： http://www.city.hiratsuka.kanagawa.jp/art-muse/2009205.htm
empty