當年今日
關於我們

劉鑾雄︰明事理的人 不會傷害他
羅兆輝:不想再過這樣的日子

蘋果日報 2002/03/10 00:00


【本報訊】「我真係唔想再過呢啲咁嘅日子!……我要做番以前嗰個羅兆輝。」結束在英、法瘋狂行徑返港的昔日地產界神童羅兆輝,經過昨日整日休息後痛心疾首地表示要重新做人。羅媽媽亦哀求記者不要再訪問她的兒子,讓他好好休息。至於羅兆輝近日的言論,是否會引起有人對他不利,他的好友富商劉鑾雄強調:「明白事理嘅人都唔會傷害佢。」而英皇集團主席楊受成再三表示:「我一啲都唔嬲,可以原諒佢。」 記者:陳凱韻、張止寒
記者昨晨與羅兆輝傾談,指出他在記者會上的言論可能引起軒然風波,但羅兆輝似乎不以為然:「咩事啫,𠵱家搞到全世界個個人以為我癲,我都唔知幾清醒!」
「……喺巴黎,我去邊你哋(記者)跟去邊,我着住拖鞋趕你哋,你哋就話我癲,……喺巴黎梗係shopping啦,唔係可以點啫,我買乜嘢,你哋都話我癲,成日閃光燈影我……你哋對我咁衰我都有請你哋一齊食飯,一齊去玩,知你哋人生路不熟,我無錢埋單係有人陷害……」他愈說愈激動。

羅坦言真係好攰
當記者問他返港之後如何過日子,這位曾坐擁十億身家,一度自信十足的神童輝突然黯然:「我都唔知想點,……我好想做番以前嗰個羅兆輝,我要低調,我真係好攰,搞到爸爸媽媽好唔開心,我都好唔安樂。」
記者再問他會否重新振作?他突然哭着說:「我希望自己繼續清醒,我真係唔想再過呢啲咁嘅日子,……我要做番以前嘅生意,我唔會再食(可卡因)……」他哭得抽搐起來,斷斷續續地訴說今是昨非。最後他表示太疲倦了要休息才結束訪問。
羅兆輝前日在記者招待會上,指一名著名商人曾出賣他,羅聲稱要懸紅三千萬給可以提供資料令該名商人入獄者,又稱準備敵意收購對方屬下的集團。
對於羅兆輝近日發表的言論可能引起一些人不滿而對他不利,羅兆輝的好友華人置業大股東劉鑾雄(大劉),雖然身在歐洲,接受《蘋果》記者訪問時仍表示異常關切地回應:「我本人就冇聽過(有人對羅不利)呢件事,因為我唔喺香港,但我相信,明白事理嘅人都唔會傷害佢,明知一個人神志不清、或者飲醉酒、受藥物影響,佢所做嘅言行,應該唔會去怪佢。」
而正在北京公幹的英皇集團大老闆楊受成昨日再就羅兆輝前日在記者會上對他的批評作出回應:「我一啲都唔嬲,以佢(羅兆輝)現在嘅精神狀態,我好理解,可以原諒佢,真係好希望佢早日康復,快啲醫番好個病。」
羅兆輝於二○○○年十二月二十一日晚上在其豪華遊艇上燒炭自殺獲救送院,劉鑾雄與楊受成先後前往探望,二人其後更因羅兆輝自殺問題發生過爭拗。

陳醫師拒說藥方
羅兆輝目前正在何文田住所休養,由父母照料起居飲食,記者昨午登門造訪時,羅媽媽開門回應,哀求說:「唔好意思,我哋一直好怕見記者,加上呢啲新聞報道對我個仔唔係咁好,求你畀佢休息,佢以後都唔會再接受訪問,希望等佢好好休息,我好多謝你。」
前年羅兆輝燒炭昏迷後曾經替他治療的中醫師陳國聯,前晚趕到羅兆輝住所為他斷症。陳國聯昨日表示,覺得羅兆輝需要多些休息,對於羅兆輝的病情、所處藥方、以至何時康復,陳國聯均拒絕評論。