去年股價一度暴升50倍嘅蒙古能源（276），噚日因為一篇關於準大股東嘅報道，股價急挫19.11%，收報8蚊，成為20大跌幅股份季軍。股價跌得咁急，蒙能「循例」都要出份通告解釋「不知悉導致股價波動的任何原因」。
篇報道係起出「低調」準大股東嘅底細，蒙能既然出通告解釋，當然要順便為篇報道做過「簡單」交代：第一，有關LiuChengLin（即劉丞霖，注入蒙古煤礦的準股東）10年前涉嫌「慕馬貪腐案」被查一事，已證實對蒙能將會攞到蒙古西部特許權係完全無關，特許權業權亦由蒙古律師核實咗，潛台詞係，準股東有冇作案，同蒙能礦權冇一丁點兒關係。

改名貪吉利

第二，蒙能向劉丞霖查詢過，當年因為有一名佢相識嘅第三者接受調查，佢先會牽涉入案，件事已經完結咗；第三，劉丞霖話，06年因應一位相識之士嘅提議先會改名，因為「劉丞霖」有吉利之意。
篇報道話，劉丞霖先後有三個名，前名劉熙奇，原名劉愛黨。睇嚟劉生都結識咗唔少相士，一次又一次改名，生意亦越做越大，初初主要喺瀋陽做房產開發同埋裝修工程，之後在港設立多家礦業公司，𠵱家仲泊到新世界（017）彤叔兩父子呢個好碼頭，唔通改名真係咁吉利？