關之琳、林心兒、水原希子同混血女模李詩穎Maxi，噚日出席喺上海時裝周舉辦嘅Moiselle2018早秋系列時裝騷，同時關之琳亦發佈Rosamund Moiselle嘅第四季系列。品牌老闆陳欽杰同太太徐巧嬌、太子爺陳柏熹(Harris)一早到場打點，水原希子仲為品牌性感壓軸行騷。至於原定出席嘅何超盈因航班延誤趕唔切到場。

之之提到新系列除咗睡衣，仲有休閒元素嘅服裝，設計細節都加入咗自己喜愛嘅生活文化，而為咗每月都有新款式推出，之之話個腦不停咁諗，經常搞到失眠， 佢仲多謝Harris嘅古靈精怪創作，幫咗佢好多。講起購物，原來本身係買衫狂嘅之之依家對購物冇晒興趣，佢話：「o依家鍾意着運動衫，打扮隨意，一星期着過嘅衫，可以不斷再着，一來環保，二來可以唔買咁多衫。」問到啲衫係咪多到要貨櫃先裝得晒？之之話：「又冇，一係送畀人，但係有啲晚裝太靚又唔捨得送，曾經試過有過千件衫，會考慮做慈善捐出去。」

之之又爆最近搬新屋，佢笑言自己有搬屋癮，鍾意新鮮感，不過今次搬屋就好大陣仗，佢話：「今次花咗好多心思落去，因為租又唔係，賣又唔係，所以畀自己享受吓，不過呢5年、10年都唔好搬嘞。」原來搬屋時單單要搬啲衫都令佢好頭痛，佢話：「多到要用3架推車載滿晒，我發誓唔再買咁多。」之之仲話見到衣帽間掛滿兩層嘅衣櫃，搬屋時簡直晴天霹靂，成間mini boutique咁，佢話：「女人幾離譜，其實唔需要咁多。」

而有指Harris會接拍大陸真人騷，富二代突然轉戰幕前？Harris直認傳聞屬實，但就話未可透露細節，佢仲話：「唔係專登要參與幕前，只係一個機遇，暫時都係專心時裝生意為大前提。」之之就教路，叫Harris要抵得眼瞓先好拍，而佢哋仲有意為品牌拍攝短片，不過之之就話唔係要嚟止戲癮，而係貪玩貪得意。

另外，水原希子首次踏上天橋行騷，佢話平時鍾意打扮隨意，而今年佢將會接拍多部電影，又會搞自家時尚品牌，會出床單、襪等等物品，最後，佢仲大晒國語話：「謝謝大家！Bye。」

精選娛聞，喺晒《娛果》
http://fb.com/appledailyent