劉培基今日喺香港文化博物館舉行「他Fashion傳奇EddieLau．她Image百變．劉培基」個人作品展揭幕儀式，展期由聽日（17號）起至明年1月13日，今年係阿梅逝世10周年，劉培基作品展會展近70套作品外，當中包括20幾套「百變天后」梅艷芳嘅舞台服。

今日，劉培基一眾好友白雪仙、陳寶珠、林燕妮、馮寶寶、鄭秀文、許志安、周迅等到賀，星光熠熠。劉培基受訪時，仲兩度激動落淚，阿梅愛徒何韻詩亦眼濕濕。劉培基話今年展覽籌備兩年，係佢一生嘅回顧，佢話最感動係人生中突然有個親人，更揚言冇人可以取代阿梅歌聲：「我估唔到佢會立一份咁嘅遺囑，令我好黯然，有咗個親人咁，因為我屋企冇親人。」(按:阿梅喺遺囑裡面，將名下分別位於倫敦同跑馬地嘅房產，留俾摯友劉培基。)

劉培基又感嘆阿梅生前未遇上真愛，佢話：「當日阿梅同我講設計件婚紗，點解咁多才多藝嘅女人，冇一個男人鍾意佢，點解要著套婚紗嫁俾舞台，又搵邊個同佢揭頭紗呢？所以我設計到唔使揭起。」

何韻詩話為免感觸，噚日預先睇咗，但都忍唔住喊，問到今次有否邀請梅媽出席？佢話呢個唔輪到佢話事。另外，安仔同女友鄭秀文刻意前後腳出現，免成焦點。


展覽資料:
地點:香港文化博物館舉行
新界沙田文林路1號
展期:7月17日起至明年1月13日
網址: http://www.heritagemuseum.gov.hk/chi/exhibitions/exhibition_details.aspx?exid=208