韓國男團EXO噚晚開始，一連兩晚喺亞博館舉行「EXOPLANET #3 – The EXO’rDIUM–in HONG KONG」演唱會，噚晚舉行首場，成員都準時7點現身開騷，又唱又跳足近三個半小時。由於係事隔一年多再次來港開騷，成員都勁興奮，笑言開心到「癲癲哋」。

EXO噚晚唱足近40首歌，包括人氣歌《Mama》 、《Wolf》、《Overdose》等。除咗例牌嘅又唱又跳外，亦有Lay及燦烈表演彈結他、Lay孖Kai及世勛濕身哂舞技、狂講廣東話冧港迷等。

可能因為今次係EXO 2017年首場演唱會，成員Lay及Xiumin都自爆表演時有少少失誤。而Kai除咗濕身晒舞技外，又有着背心騷肌肉，連Suho都話:「Kai係咪好性感呢?因為佢好叻做運動。」

Suho又賣口乖讚粉絲啲韓文好叻，差啲以為係喺韓國開騷。不過就話粉絲準備嘅英文應援燈牌「You are my only one」拎反咗，睇唔清啲英文字，仲差啲以為大家咁早預祝佢生日。

伯賢就透露即將出新碟:「成員好用心地準備專輯，請大家多多期待。」大陸成員Lay噚日講多咗廣東話，佢話: 「因為我最近喺廣州拍戲，所以學咗啲廣東話。如果我想你哋嘅時候，我食菠蘿油，如果我非常想你哋嘅時候，我食兩個菠蘿油。」又開始廣東話教學時間，教韓國成員簡單嘅打招呼詞語，不過佢都唔知Xiumin(金珉錫)嘅廣東話點講，於是行近台邊問粉絲，但就講唔準，變咗「金文色」。

演唱會去到尾聲時，Suho話:「我哋好開心，都跳到好似癲咗咁。事隔一年再嚟，成員今日都癲癲哋，大家都癲癲哋，一齊keep住呢個癲癲哋。」Lay就祝大家元宵節快樂同雞年行大運，嚟個遲咗少少嘅拜年。最搞笑嘅係Kai，佢喺成員講嘢時唔見人，之後再衝返上台，笑住咁坦白話:「好急，唔可以忍到最後。」仲強調係小便，唔係去大。

世勛繼續晒普通話:「今天開心嗎？我也開心。今天好有意思。今天很累，我也瘋了。身體最重要，知道嗎，大家都聽得懂嗎？聰明。」粉絲就話係因為世勛啲中文厲害。臨走前，EXO又預告今年會再嚟香港。

到EXO唱最後一首歌《你的世界》時，伯賢一直追住粉絲掟上台嘅精靈球公仔，又玩到瞓哂地。不過燦烈更出位，戴上狂人面具，成功搶鏡。