崔碧珈（Anita）不時都喺社交網更新近況，最近做咗「空中飛人」嘅佢，一時喺法國，一時就係德國，但轉眼又去咗上海出席電影節。不過，今日下午3點幾，佢就分別喺ig同微博貼咗瞓喺醫院，同埋一張影住血淋淋嘅傷口相，相當嚇人。

Anita留言話：「從來我都是一個喜歡報喜不報憂的人，希望能把正能量帶給大家，和大家分享我的工作和開心事，心裹是一直不想大家擔心，所以之前在海外工作時都無刻意提起自己的傷勢，連自己的家人和經理人也沒有提及，結果沒想到傷口一直不能痊癒並且更加惡化和受感染潰爛，傷口直徑達5cm，被迫暫停工作。過去三星期在外地工作前後進行兩次手術，早幾天回到香港給醫生跟進，繼續留院養傷。因此而影響到之後的工作日程，為大家帶來的不便，深感抱歉。」

《蘋果》向Anita助手了解其受傷經過，其助手說：「佢喺德國嗰時，有一晚沖涼，唔小心畀自己崩咗嘅指甲刮損咗肚皮，點知第二日瞓醒個傷口已經變大，好似個一毫子咁，當時佢喺德國，即刻去睇醫生，喺雞同鴨講情況下做咗個小手術，醫生幫佢聯埋咗個傷口，但跟住去上海做嘢，傷口又開始惡化，啲線爆開咗，傷口已經大到有5cm直徑。由於皮肉變黑，醫生即刻再同佢做多次手術，將壞死嘅肉刮走。」Anita助手又話，佢日前已經返港再求醫，依家喺醫院休息緊，但都要再檢查先知係乜嘢菌。

精選娛聞，喺晒《娛果》
http://fb.com/appledailyent