購物焦點:
陀螺熱潮爆發搖搖一定Out

蘋果日報 2002/03/26 00:00


3月28日全港市民可能都會改變生活習慣,小朋友唔再覺得攞住個搖搖FingFing吓係有型有款,而改玩陀螺係咁轉;事關喺日本紅到發紫,集花式、改裝、比賽、潮流、炒賣於一身嘅《爆旋陀螺》動畫,將會緊接《超速搖搖》登場,唔想俾人話你Out,淨係識得玩搖搖的話,就要睇吓陀螺有乜花款,連帶動畫人物都介紹埋畀你知,實行等你快人一步。

記者:張穎倫 攝影:周旭文
日本有幾掂?
有齊動畫、漫畫嘅《爆旋陀螺》唔單止喺日本嘅玩具店大賣特賣,原宿舖頭更出現炒價,就連日本專介紹潮流玩意雜誌《mono》都搵佢做封面,再加兩大版介紹,甚麼XBOX、DiMAGEX都暫時讓路。

玩法自由
事實上爆旋陀螺係冇特定嘅玩法,你可以自己一個人玩獨創花式,甚至埋首於改裝陀螺都得。比賽就通常會以將對手撞出比拼場外,又或者鬥旋轉時間長為勝負準則,比較客觀唔怕有爭拗。
旋風白龍3段變身至矜貴
呢個「藍珍珠速龍旋風白龍陀螺」同樣都係主角孝男用嘅,但就比「暴擊青龍」更加矜貴,事關佢採用特別色嘅透明藍設計,同其他實色陀螺好唔同。佢唔單止係陀螺,更有埋3段變身,隨意變成飛行型、白龍型同剪刀型,玩法極多,啱晒珍藏之用。
主角專用暴擊青龍
呢個係主角孝男選用嘅陀螺之一,擁有傳說中四聖獸之中青龍聖獸嘅攻擊之血,所以攻擊力特強。雖然只得4層構造,但由於配備教授設計嘅膠製平底,令佢移動力大增,旋轉範圍更大,就算面對一般5層構造嘅陀螺,都一樣撞贏。
相撲巨熊攻擊力量
《爆旋陀螺》嘅故事好似《足球小將》一樣,先由日本開始比賽,成為全國冠軍之後,再參加世界賽。所以中國隊當然有份啦,而且角色加奧所用嘅「相撲巨熊陀螺」,更擁有二重攻擊環,故事中被譽為史上最大攻擊範圍陀螺,攻擊力超強,自己人點可以唔捧場。
一飛衝天蠍子聖獸
喺故事中擁用飛天能力嘅「飛天蠍子聖獸陀螺」,屬於防禦型陀螺,由美國隊嘅愛迪所用。雖然真實玩嘅時候唔識喺空中停留,但憑住9cm直徑嘅特大攻擊環,其他陀螺都幾難埋佢身。真正比賽時非常着數,而且設計又比其他陀螺特別,值得推介。
配件夠吸引
如果獨沽一味得陀螺,可能好快就會玩厭,所以廠方亦推出唔少配件,由加強威力嘅爆旋器到比拼場都有,以增加遊戲的變化。

火渡凱爆旋器
改邪歸正嘅火渡凱實力強橫,Fans數量同第一主角孝男不相伯仲。佢用嘅「彈簧式旋風爆旋器」,更係大部分小朋友嘅必備配件。皆因佢唔單止設有手柄可以增加發射陀螺時嘅穩定性,而且爆旋器上加設彈簧,能有效加強陀螺旋轉力,要贏對手話咁易。
比拼場玩得安全
爆旋陀螺轉速驚人,如果冇一個適當場地比賽,隨時周圍飛彈親人,而且亦難分勝負。應該利用呢類「八角迴旋戰鬥比拼場」,既可以跟足賽例出場,作為勝負準則,再加上又附送透明圍牆,能有效阻止陀螺四圍彈,夠晒安全。
動畫故事講乜?
小學生木之宮孝男極之熱愛陀螺玩意,有一日因為要幫好朋友出頭,所以就以陀螺同爆旋家集團shellkiller決鬥。後來孝男更從一個神秘人手中得到傳說中嘅「青龍聖獸陀螺」,令孝男立志成為陀螺家,開始挑戰全日本,以及參加世界賽嘅刺激旅程。由3月28日起逢星期二及星期四,下午5:05於翡翠台播映。
人物簡介:本之宮孝男
第一男主角,對陀螺充滿熱誠,做事有幹勁,係一個極之魯莽嘅少年。
陀螺流行有因
能夠風靡全日本,賣點當然唔會少,單講款式已有過百款,比搖搖更多,動畫中每個角色都有2、3個陀螺,又有絕招、特性,小朋友一睇就投入。另外,某啲陀螺又會推出金版、銀版等限量發售,吸引玩家、炒家搶購,所以𠵱家日本原宿唔少舖頭都已缺貨,或者賣貴兩、三倍,小記相信呢個情況好快就會蔓延到香港。

售賣點:
你想TeeN地(26973220)
沙田正街18-19號新城市廣場第一期275號舖

玩具反斗城(27309462)
尖沙嘴海運大廈地庫032號舖

鴻興玩具(28914739)
灣仔太源街19號C舖
爆旋陀螺世界挑戰賽
世界賽唔單止係大人嘅玩意,小朋友都有機會參與。好似嚟緊嘅陀螺比賽就只限6-12歲嘅小朋友參與,成為全港冠亞軍嘅兩位,就可以代表香港出席5月26號喺日本舉行嘅國際挑戰賽,同美國、日本、韓國嘅精英一較高下。

香港初級賽
參加辦法:
程序1)於玩具店或百貨公司免費領取報名表。
程序2)填妥報名表並貼上爆旋陀螺產品上嘅《新華行總代理標記》。
程序3)帶同新華行代理嘅爆旋陀螺於下列任何一個比賽日,到達你想TeeN地、玩具反斗城等比賽場地,並將報名表交與爆旋陀螺大使,便可即時參賽。
比賽日期:3月29日、3月30日、4月2日、4月3日、4月7日、4月13日、4月14日、4月20日、4月28日
查詢電話:25281076
網址: http://www.otchk.com
(c)HUDSONSOFT/TAKARA·BEYBLADEPROJECT·TVTOKYO