As One前成員陳嘉茵，噚晚喺銅鑼灣舉行個人首次小型音樂會，又跳又唱14首歌，第一首演繹嘅歌就係佢首支派台歌《大肆慶祝》，林作同范振鋒都有捧場，林作仲攞埋燈牌嚟，笑言：「好多人叫嘉茵，可以翻用。」

嘉茵首個個人music show，佢話：「準備咗14首歌，當中3首歌會跳舞，一首新歌、一首之前台灣比賽、一首係為今次個數騷排練嘅容祖兒《全新暑假》，為咗呢個騷提前兩個禮拜操練跳舞，唱咁多快歌、跳舞，體能都需要有。」

嘉茵話暫時唔夠膽開大型個唱，計劃今年派多幾隻新歌，佢話：「好開心過往有As one嘅經歷，去韓國集訓，又有好多人教我好多嘢，今日佢哋都有嚟睇我，好多謝佢哋教咗好多嘢，今日獨立發展嘅時候，有更多嘅信心同埋更多嘅經驗。」對於年尾音樂頒獎禮，嘉茵表示盡力而為，自己一直都好鍾意唱歌跳舞嘅，希望大家會對佢刮目相看，今年儲會做快歌為主。

范振鋒到場支持公司旗下嘅嘉茵，佢話：「嘉茵好識諗好易相處，所以公司簽咗佢，跳唱歌手呢幾年都冇乜，佢係純跳唱歌手，近年少見，我哋出年會有個男仔，同埋兩個女仔嘅組合推出。」

精選娛聞，喺晒《娛果》
http://fb.com/appledailyent