萬千星輝頒獎禮嘅飛躍進步男女藝員由姜晧文同陳煒頒發，陳煒仲換咗套衫上台頒獎，黑仔仲賣口乖向一班大台高層打招呼。飛躍進步男藝員就由何廣沛奪得，佢上台話：「多謝公司頒呢個獎畀我，我好感恩，由我訓練班畢業，到企喺呢個台上，我好幸運遇到好多唔同類型嘅劇本、唔同嘅角色，都好感激公司又安排好多前輩同我合作，畀我喺佢哋身邊偷師，每一位都係我好好嘅榜樣， 當然要多謝我屋企人、多謝26期訓練班嘅兄弟姊妹同埋導師鄭丹瑞，旦爸，我得咗喇！」

而飛躍進步女藝員就由馮盈盈奪得，佢一知道自己得獎，個樣即刻變得好想喊咁，佢喺台上話：「唔好意思，因為一直以嚟以為自己唔會拎呢個獎，所以冇諗講啲咩，仲諗住頒完去洗手間，我覺得自己係未夠班嘅，所以一定要好多謝一直以嚟畀機會我嘅人，我覺得自己嘅表演未夠滿分，佢哋好大膽畀機會我，嚟緊要再努力啲，先可以再進步，未來我會努力做好。」

精選娛聞，喺晒《娛果》
http://fb.com/appledailyent