雖然超強颱風「山竹」已經同香港人講拜拜！但影響真係好嚴重，塌樹搞到港鐵架空電纜受損，樹枝散落每條馬路，打工仔今朝早逼車趕返工，但遇上交通大癱瘓，的士又坐地起價，真係苦咗啲小市民打工仔。

行政長官林鄭月娥今早交代山竹吹襲後嘅工作，被傳媒問到點解唔直接安排全港停工，佢只係話由僱主同僱員以互諒互讓、體恤方式進行，更適合香港現時情況。

好彩，仲有良心老闆，月前喺油麻地開咗間甜品店嘅羅鈞滿，體恤員工狀況，今日休息一天，舖頭連埋打風休業兩日。

羅鈞滿今日接受傳媒訪問，回覆話：「舖頭關門兩日會有損失，但未至於好大，今朝六、七點轉三號風球時，我出過街，見到四周圍都係樹葉同樹枝，屯門公路好多塌樹，荃灣有啲路直情係俾成棵樹攔晒，知道香港多個地方嚴重，眼見呢個情況，根本就唔適合外出，更談不上去返工。」

佢間甜品舖大約有十名員工，羅鈞滿話同事住喺大埔、屯門、東涌、香港仔、荃灣都有：「全晚有留意新聞，巴士大部份日間都暫停，東鐵都係部份路段行駛，都唔知點返工，所以唔想啲同事咁辛苦，唔想佢哋花好多時間出鋪頭一陣，然後又要花好多時間返屋企，而且學校又停課，有部份同事有小朋友，都可以留係屋企照顧下。」問到舖頭有冇損毀？佢話：「暫時情況都樂觀，只係門口嘅招聘招紙吹到得番個框。」

精選娛聞，喺晒《娛果》
http://fb.com/appledailyent