建行噚日公布中期業績，最矚目嘅，唔係佢哋位董事長郭樹清，而係上任冇耐，唔做交行行長轉過嚟做建行行長嘅張建國。搵到張建國做行長，建行就梗係開心啦，難為交行到家吓都仲未搵番個夠份量嘅人接任，前幾日中期業績，都只係得董事長蔣超良一人撐住。
張建國由交行轉到建行，市場上有好多批評。噚日佢首次以建行行長呢個身份露面，傳媒都老實不客氣，直接問佢真正原因，見慣大場面嘅張行長答得好大體，話自己生在北方，成長在北方，又曾經長期喺北方做嘢，好巧妙咁話畀大家知，佢捨交行選建行嘅環境因素。

堅持要做國際人

大家又點會輕易放過佢，再追問佢當自己係國企官員，定係專業銀行家？張建國笑笑口話，呢樣嘢就見仁見智，好難嚴格分開，事關家吓愈嚟愈多民企專才為官，又有唔少國企官員走入民企，輕輕將問題帶過，非常醒。不過愈係醒，交行小股東咪愈火滾，有乜理由將個叻人讓畀競爭對手？係咪政治凌駕商業？如果係，呢啲企業評價就要重新計算。
講番個業績會，司儀一開始就話會用普通話進行，華華即時醒晒，事關唔少國企，為咗顯示國際化，啲發言人都會「中國特色口音」嘅英文做簡介，係聽到耳都側埋嗰種，點知開心咗唔夠兩分鐘，郭董事長同張行長都係要做「國際人」，齊齊講英文，好彩到最緊要嘅答問環節，依循慣例用番煲冬瓜！