AKB48兩名成員川榮李奈及入山杏奈，以及一位工作人員，噚日喺日本岩手縣握手會上，被一名24歲兇徒梅田悟斬傷手指，要即時送院急救，經過三小時手術後，總算冇生命危險，而劇場負責人湯淺洋今午現身會見日本傳媒，佢向傳媒講番兩名成員情況，佢指兩女做完手術後，手指已經打咗石膏，傷口冇咁痛。

有指佢哋頭部亦告受傷，湯淺洋就話頭部傷勢唔深，冇乜大礙，不過川榮及入山分別喺唔同病房休息，兩女亦擔心對方傷勢，搞到冇乜胃口，不過心情就平靜番。