亞視永恆，呢句說話真係一啲都無錯。當你以為佢已經唔再喺眼前出現，其實佢默默咁上咗無綫身。

打開電視機，o依家幾乎套套劇都見到亞視前藝員嘅身影，陳展鵬、鮑姐嘅《同盟》唔在講，無綫仲簽咗林韋辰、張文慈等嘅亞視人，甚至連第一屆亞洲小姐冠軍黎燕珊都成為咗無綫一份子。

除咗藝員，無綫亦好有亞視作風，每晚都同觀眾重溫劇集，《衝上雲霄》、《創世紀》、《天地豪情》等等都不停重播。每個星期又有節目重溫舊歌，開住電視機就好似坐咗時光機，返番去上個世紀。

但最最最有亞視味嘅，係無綫嘅收費頻道，其中有個台就名正言順可以睇亞視劇集，《大地恩情》有，《再見艷陽天》有，簡單講，即係成個亞視喺晒度。