樂瞳本月中完約無綫，走夾唔抖，暫時要呼吸自由空氣，唔會簽經理人，佢話要先學自己管理事業。（新聞連結： http://bit.ly/2uqNv49 ）冇約綁實，樂瞳接job自由度大咗，佢噚晚就喺上海出席髮型騷賺人仔，樂瞳set靚頭，換埋爆乳晚裝，以淑女look亮相。

樂瞳自嘲天生唔係model身形，過往行騷好少有佢份，但呢次獲大會邀請行處女髮型騷，佢話好過癮。樂瞳今日接受《蘋果》電話訪問時話：「好好玩，呢次個騷主題係party，之前一晚有綵排，踩台時見到專業模特兒表現。我處女下海，呢次經驗好特別，咁啱又係離開香港去行，開頭以為身高唔慣，但綵排時導演讚我表現，話我行時好有跳舞感覺，所以出台時我打咗強心針，當正自己係超模咁行出來，呢次條裙又好靚，令我個人比例好好。」