陳潔靈同許廷鏗今日去咗沙田，出席港台舉行「DJ·歌手再重聚音樂會 - 向Uncle Ray致敬」，為即將94歲嘅Uncle Ray送上金曲。

陳潔靈坦言同DJ工作結下不解緣，喺13歲已經做商台DJ嘅佢，先後做過三大電台，當年自己一個人主持節目兼報新聞，陳潔靈話覺得自己絕對有能力勝任DJ嘅工作，問到若果再有機會，會想主持乜嘢種類節目？佢話：「用音樂去幫人度過人生難關，我之前修畢佛學碩士，又做關愛行動，可以結合音樂去穿越生活壓力，因為o依家好多節目講太多嘢，唔似音樂咁，可以令人沉澱。」

至於早前因法律糾紛而取消嘅澳門站演唱會，陳潔靈話正進行法律程序：「唔做，唔係代表有錯，係我作為領導者有責任保護團隊，唔可以要大家帶問號上台演出。」

剛推出同名大碟嘅許廷鏗，日前諗住親自買十隻碟送畀之前做過校園騷嘅學校，不過新碟就俾Fans買晒，佢話：「出碟難，原來買碟同樣難，因為唱片舖越嚟越少。」為咗提升大家買碟動力，佢透露會喺某部份唱片舖附送特別版本。

提到碟內收錄嘅最後一首歌《再講一句話》，係七月中時，盧凱彤為佢伴奏嗰陣收錄嘅現場版，許廷鏗話：「當初只係第一日試key，之後竟然喺人山人海部電腦一搵就搵到，就當做留畀我嘅禮物。」

精選娛聞，喺晒《娛果》
http://fb.com/appledailyent