「豪宅」本來係尊貴身份嘅象徵,但今時今日呢兩個字,就用得好濫,事關10個樓盤,有8個都話自己係豪宅,聽都聽到大家麻木晒,而網友們亦對呢類新興豪宅議論紛紛。
Antia_block喺《香港討論區》就為呢類豪宅落咗個新定義︰「新豪宅咪係啲高層好豪,低層中產,隔籬街就係地盤佬、工廠佬、街市佬嘅地方嚟……」
網友LittleTomato好同意Antia_block嘅講法,仲舉例︰「工廠區的豪宅──爵悅庭;舊區中的豪宅──翔龍灣;偏遠地區豪宅──御皇庭。」
kwchan就認為,現時豪宅嘅定義只係單位呎價較全港平均呎價高於特定水平嘅住宅。至於DT1025就演繹得更加傳神,佢話︰「豪宅=您有多餘錢『豪』畀發展商嘅住『宅』。」