美國女星梅根馬克爾（Meghan Markle）自從同英國皇室哈里王子拍拖之後，就飛上枝頭，早前有指佢將坐駕退租諗住搬去倫敦，周一二人更首次以情侶姿態公開拖手現身公眾場合。

哈里王子同梅根拖手，現身加拿大多倫多網球場睇「不可征服運動會」（Invictus Games）輪椅網球賽。36歲曾離婚嘅梅根一身隨意打扮被指有氣質，並已經開始注重公開場合儀容。二人期間不停咬耳仔，哈里王子仲有攬住梅根錫佢個頭，非常甜蜜。據英國皇室事務專家Myka Meier所指，二人應該好事近：「我相信佢哋快將訂婚，我覺得佢哋於咁公開嘅場合展示關係，係經過哈里王子嘅有意識嘅考慮，亦展示出佢哋認真嘅關係。相信梅根係跟隨哈里王子嘅帶領去做。」二人應該會快將訂婚。