效力皇家馬德里嘅中場卻奧斯，球技未必係世界最好，不過講善心都真係數一數二；佢名下有一個慈善基金，專門協助長期患病兒童及佢哋家人，卻奧斯日前就捐出剛贏得嘅西超盃獎牌同簽名波衫，放上網拍賣籌款。

卻奧斯捐出物品都好有紀念價值，事關西超盃兩回合皇馬都擊敗巴塞捧盃，而件波衫亦係佢次回合比賽所着，而且呢位德國中場仲簽埋大名落去。卻奧斯放上www.unitedcharity.de拍賣，暫時叫價約5千歐元（約46000港元），9月底就截止拍賣。其實卻奧斯在上屆歐聯決賽之後，都拎自己件冠軍波衫拍賣，已經籌到64萬歐元（約732萬港元）添。