政務司司長唐公子噚日在山頂官邸宴請前線記者，主人家講明只談風月，因此唐公子對所有正經事都係打哈哈回應，反而司長夫人未飲先high，講到俾中央狠批嘅五區公投、全民起義，唐太直指對付策略好簡單，就係唔派人落場玩，咪冇公投冇起義囉！
對此問題唐太似經過深思熟慮，更以打羽毛球為例解釋，「兩塊拍先打到，一塊拍打唔到o架。」自由黨噚日傍晚先宣佈唔玩公投，唐太中午時已有此說法，令人猜想唐太是否在背後發功。八方罕有聽聞高官配偶論政，好似唐太咁一針見血更係聞所未聞，唐公子他日搵人接班，唐太大可夫位妻繼，做個港版希拉莉。

請80後飲80後

唐公子家宴豈能冇紅酒？噚日佢同記者玩咗個品紅遊戲，每人斟四杯不同年份紅酒，飲完後估吓屬於乜嘢年份，大部份記者都係斷估，錯多過啱，連唐太都估錯三次，唐公子管家話老細品酒達大師級，功力出神入化仲勁過師傅級，「除咗百佳幾十蚊嗰啲，全部佢都分到年份。」
噚日獲邀記者好多係80後，唐公子以私人珍藏80後紅酒宴客，其中一支85年紅酒據講身價幾千蚊，另有三支93年、99年及2000年佳釀，幾十人乾咗最少16支酒。唐公子藏酒量豐人所共知，佢話做官後無暇去法國買酒，家多數由酒商空運酒辦畀佢試貨，少好多人生樂趣。
mailto:[email protected]