新馬季開鑼（3日）偏偏遇上打風，希望有運能夠避開順利開鑼。

今個馬季有令人煥然一新感覺，兩個新馬房只有羅富全有馬出，雖亦只派「銘記心中」打單箭頭，但扳到用雷神，好明顯係馬房部署好的開齋馬。

事實上，「銘記心中」在上手時已係馬房裏罕見演出準繩的，未贏到好肯定只是馬房未真正谷起狀態，如今落入羅富全手，跑高十分八分係意料之中。

另一邊廂，大摩終於簽貝湯美為帥，以大摩作風一定會炮製攻勢予主帥打響頭炮，第二場「甜統」最符合資格，初落五班跑極着數外，上季初出59分跑四班1400米上名，反映本身初出即拼冇問題。

雖然今次所跑係1600米，但上季同程曾入Q而且係好黏地，相信場地如起變化對「甜統」不會有影響，最重要係有賠率，最啱大摩作風，始終上季中打後立心收埋減分。

如今「求仁得仁」落到第五班，面對呢組對手，以「甜统」三歲可以贏四班，目前五歲大熟直線反彈，絕對做得到有餘。