踏入年尾，八大院校輪流舉行畢業禮，八方都要四圍撲，不過都執到啲漏網新聞，話說上周中大畢業禮，即連戰去中大攞榮譽博士嗰日，公務員事務局局長王永平都坐喺前排，但佢並唔係去捧連主席場，而係為咗一位女畢業生。

王天慧喺醫學院畢業

呢位畢業生叫王天慧，今年中大醫學院畢業，跟住要喺威院實習，先至完成晒課程。時間過得真快，八方記得多年前同王局長食晏，佢話個女鍾意讀醫，中大港大唔知去邊間好，最後就揀咗中大，佢就係王天慧。
平叔一向好低調，所以當日冇記者發現佢。有女長成，重做埋醫生，做爸爸嘅當然高興。八方屈指一算，特區政府班高官，都有好幾個醫生仔女，煲呔個大仔曾慶衍𠵱家喺瑪麗任職，個新抱亦行醫；李國章自己係醫生，佢兩個仔民英同民俊都跟老竇一樣學醫，聽講李局長十分欣慰，因為三父子多咗好多共同話題。
至於周一嶽雖然都係醫生，但係兩個女好似未定讀乜。其他司局長，啲細路一係太細，一係讀法律（葉澍堃個乖仔同林D9個叻女），其他就專業人士居多，李少光個仔做影碟舖老闆就比較特別。

盛傳頂替鬍鬚仔空缺

八方笑平叔仔大女大，做埋呢屆剛好五十九，都係時候退休享吓清福啦。其實王永平都算穩打穩紮，不過，始終有人唔抵得嘅，因為當初佢答應老董做問責局長，啲公僕以為佢會保留公務員身份，為佢哋講嘢，點知佢老哥一到五十五，就先食咗鋪滿胡，離開公務員隊伍，學煲呔哋咬兩份糧。
咁班公僕梗係唔高興，連行會新貴張炳良最近都話由非公僕做局長並唔理想。張炳良當然冇力叫平叔調位，但係傳聞不絕，皆因鬍鬚仔做完世貿之後，分分鐘會去做特首辦主任，輔助煲呔競逐連任，而佢個位就最啱永平哥頂；至於公務員事務局局長個位，梗係交由煲呔同肥龍親信做啦。
鬍鬚仔同平哥會唔會調位，好快就知道，總之蛛絲馬迹，鬍鬚仔好似預咗搞埋單大嘢就鬆人，但係平叔就冇乜準備。煲呔如果政改搞唔掂，睇怕係時候諗吓點樣調兵遣將，先至保得住強政勵志個招牌。


爆料熱線：29290000、27860099
報料傳真：26239278
報料電郵：[email protected]