劉偉強今日喺會展為《第五屆微電影頒獎典禮》擔任嘉賓，可嵐、安俊豪係參賽者之一。

劉偉強話O依家啲短片水平好高，唔少小學、中學都已經有電影班同Studio畀同學學習：「數碼化又做得好，剪片啲軟件又愈來愈好。年青人打慣機好快上手，嗰時我個仔中二都做得唔錯，真係唔同以前，水平好高。」

佢仲話會發掘啲有潛質嘅新人：「簽番嚟掃下地囉，唔係講笑㗎，我叫佢哋做散打王，即係乜都要做，我以前都係咁，我覺得呢個傳承幾好。」劉偉強叫年青人唔好心急，多啲去跟場、睇下拍攝環境，先再拍長片都唔遲。

至於有份參賽嘅可嵐，今年就做演員：「上年就以導演身份參加，不過作品都係一般。今次就用我嘅歌《愛了算了》拍關於友情嘅微電影，出嚟嘅效果有啲《春嬌與志明》feel。」可嵐話囝囝都有睇過條片，仲大讚媽媽靚：「我自己都睇咗好多次，佢同我講『Mommy，that's you. I think you are beautiful.』好開心。」

精選娛聞，喺晒《娛果》
http://fb.com/appledailyent