曾出演《青春時代》、《加油吧威基基》嘅28歲男星孫承源被爆於今日凌晨時份發生交通意外，當時孫承源駕駛嘅車輛喺首爾江南區撞上其他車，導致對方車上嘅兩名乘客受傷，但孫承源未有停車並離開，繼續行駛咗150m左右，被附近市民同埋其他司機截停。

警方到場後，發現孫承源當時嘅血液酒精濃度為0.206%，屬於醉駕嘅程度，同時發現佢其實已於上月18號因酒駕而被吊銷牌照。

對於孫承源涉無牌駕駛兼醉駕，相關人士指，孫承源已經同原來所屬嘅Blossom娛樂冇合約，雙方合約已於今年10月到期，據了解孫承源與Blossom經過討論後，雙方終決定唔再續約。而Blossom為宋仲基、朴寶劍嘅事務所。

據悉孫承源目前有份演出音樂劇《蘭波》，而《蘭波》方面就孫承源涉無牌駕駛兼醉駕一事，亦發聲明表示將會換角由其他演員接替：「製作公司透過報道知道呢個消息，換角係在所難免，預計孫承源原定30號嘅演出，將改由其他演員代替。」

精選韓流，喺晒《娛果》
http://fb.com/appledailyent