近年韓國收費台推出嘅劇集都大受歡迎，好似《鬼怪》、《陽光先生》、《金秘書為何那樣》等，所以免費台劇集嘅收視都難以突破雙位數。

由女星宋慧喬孖朴寶劍主演嘅新劇《男朋友》近期喺tvN收費台熱播，同SBS嘅《皇后的品格》、MBC嘅《赤月青日》、KBS嘅《就算死也喜歡》三齣免費台劇集對撼爭收視，當中由張娜拉、崔振赫主演《皇后的品格》成績較好，劇集噚晚播出嘅第11、12集更分別有7.9%及10.5%，成功突破雙位數，而金宣兒主演嘅《赤月青日》噚晚播出嘅第12集雖然僅得6%，但亦創下劇集收視新高。

反而《男朋友》雖然卡士強勁，但就有網民認為劇情較慢。未知係咪受到劇情影響，《男朋友》噚晚播出嘅第4集就得9.264%收視率，未有明顯嘅升幅，同時港迷可於「黃Viu煲劇平台」同步追睇。而第5集嘅預告中可見，喬妹及朴寶劍似乎喺公園約會，朴寶劍仲搭住喬妹膊頭，將佢擰轉身，喬妹就覺得唔自在而提醒朴寶劍放手。同時朴寶劍又帶住喬妹去見佢嘅朋友，令喬妹越嚟越多笑容。不過預告中又見喬妹嘅前夫派人去調查朴寶劍，唔知係咪想追返喬妹？

精選韓流，喺晒《娛果》
http://fb.com/appledailyent