MIRROR真人騷下周一首播 隊員輪流爆喊晒真情
調教你MIRROR梁祖堯花姐MIRROR
MIRROR真人騷《調教你MIRROR》將於下周一(7日)首播,連日來劇組在網上公佈預告片,昨日第3條大約40秒的預告片曝光,片中節錄了隊員部份心聲,言談間忍不住流淚,互相擁抱支持對方。其後再見到隊長Lokman喊住說:「最近就係好迷失囉!」AK冷靜過後表示:「搵唔番以前嗰種開心,的確係!」大表哥Stanley直認:「我覺得自己好似冇乜特別!」Tiger(邱傲然)說:「無論乜嘢都好,都仲有11個(隊友)撐住我、頂住我。」
相比之下,呂爵安(Edan)反而顯得比較冷靜:「冇MIRROR我哋甚麼都不是。」姜濤表示:「我真係好希望MIRROR好。」柳應廷(Jer)說:「呢個節目可以令我哋之間了解多咗對方。」Alton還說:「明知係有徒勞無功嘅可能性,但係都想做。」而Ian表示:「睇吓大家會唔會都肯踏一步出嚟。」最後Frankie說︰「我唔理啦!衝啦!照去啦!」除了爆喊收場的真情對話外,預告片亦播放MIRROR跟導師梁祖堯大合照,MIRROR之間搞笑互動等畫面,相信這個旅程加深了他們互相了解!
在第一集內,花姐剖白將MIRROR交託給梁祖堯的原因,她坦言MIRROR每位成員均是素人出身,不知道原來娛樂圈有很多引誘及挫敗,入行後經常有迷惘的時候,所以希望阿祖出手調教他們。阿祖明白到作為藝人,「除咗應付經理人,又要應付Fans嘅期望,好多時會變咗公仔!」他期望透過今次可以令MIRROR成為有血有肉嘅人,重燃起初入行的一團火。
而梁祖堯亦在社交平台不時分享與MIRROR的相處軼事,昨日他分享對大表哥Stanley的感覺:「我會用最強和最弱的混合體來形容佢。強,佢有一個Big heart,好真心地照顧大家。你諗吓,我哋嗰陣係佢女朋友嘅隊友,都咁照顧我哋,你就估到佢係會幾咁照顧11個兄弟。甚至乎拍攝嘅時候,佢亦都會主動咁樣照顧我哋成個拍攝團隊,無論係轉場要幫手攞嘢、幫手set up、維持秩序,甚至如果有機會要除暴安良,我覺得佢都係會挺身而出嗰個。總之有佢喺度大家就會覺得好有安全感。」他續說:「咁點解會話佢弱呢?Stanley 佢有個好脆弱嘅內心。佢係一個好善良嘅人,冇人會傷害佢,但係往往佢對自己要求好高,佢會因為一個未能夠成功做到嘅位,不停咁樣反覆練習,畀自己好大壓力,越緊張就越做唔到,最後嬲自己嬲到滴下男兒淚。見到佢咁樣我就會好心痛,大家睇節目就會見到佢呢一面,而要勇敢畀大家見到自己嘅軟弱,真係要好大勇氣,我好敬佩你的真心和勇氣。」
最後梁祖堯叮囑Stanley:「 每個人都有自己嗰個階段嘅limitation。當然每個人都要努力,但係道理就同個杯半空定半滿一樣,一定要好好咁樣肯定自己而家有嘅成績同埋能力,好享受當下發生嘅每一刻,可能困難就會不知不覺地解決了,要肯定自己多一點,愛自己多一點,找回那個大無畏的初生之犢般的心態,然後再加上你現在的歷煉和穩重感,你一定會更享受每次的機會。」Stanley亦有留言回覆:「你身上得到很多啟發,重要的是令我再認識自己,多謝你,祖祖!」
阿祖不時在IG分享對MIRROR的感覺!(IG截圖)
Edan近期的工作量增加了不少,最近又單飛拍廣告。
-----------------------------