日本國民級組合SMAP已經散Band收場，踏入今年1月1日，SMAP五位成員就各自發展，有傳被排斥嘅木村拓哉今年9月會續約尊尼事務所，但其餘四人將會離巢發展。

曾經係好兄弟嘅SMAP最終不歡而散，不過只限木村被孤立，昔日隊長中居正廣跟其餘隊友仍關係密切。由香取慎吾主持嘅直播節目《SmaSTATION!!》，噚晚一集請來剛力彩芽及高嶋政伸擔任嘉賓，而香取於節目開始時就公佈會有重要消息公佈，到節目臨結束時，佢就表示下星期一集會請來中居擔任嘉賓，係SMAP解散後二人再於鏡頭前同場合體，令大批SMAP迷高興不已，但相信木村日後跟舊隊友再同場嘅機會就微乎其微。