今個聖誕，星戰熱殺到埋身，激光劍lightsaber成為潮流，財政司司長曾俊華一向好貼近潮流，政圈selfie熱潮都係由佢帶起，噚晚佢應香港迪士尼樂園邀請，同幾個受助家庭一齊入場睇《星球大戰：原力覺醒》，亦做埋潮人，攞住劍大合照。
財爺致辭時話呀，第一次睇《星球大戰》係1977年，當時由夏里遜福（Harrison Ford）做主角，點估到38年後，仍然睇到新一輯《星戰》，而主角，竟然都係福伯！

笑福伯係耆英

鬍鬚曾笑稱福伯算係「耆英」（畢竟都73歲咯），但仲係男主角喎；當堂令自己信心都返晒嚟，皆因鬍鬚曾今年都係64歲箒。
其實香港迪士尼樂園度假區亦特別趁《星戰》上映，推出星際新體驗，安排一身白色盔甲嘅大反派風暴兵，即日起登陸樂園嘅明日世界，型格巡邏，星戰迷隨時有機會同風暴兵近距離「短兵相接」。
知道大家齋睇未必夠，迪士尼動畫師亦會喺聖誕期間坐鎮美國小鎮大街嘅動畫藝術教室，向遊客傳授繪畫星戰中經典角色R2-D2機械人嘅獨門秘訣，同時推出逾200款星戰主題商品美食，引領賓客展開星戰之旅。

李八方
mailto:[email protected]