噚日(5號)係龔嘉欣嘅28歲生日，之不過因為O依家趕拍劇，於是乎今年生日要喺工作中度過，除咗有fans送咗28個壽包同佢慶祝之外，仲發生咗一件事令佢好難忘！

原來嘉欣唔止生日要開工，而且仲要着泳衣拍攝，嘉欣話：「入行以嚟都未試過拍落水戲，今次仲係第一次着泳裝拍劇，但係我唔識游水，為咗唔阻礙拍攝進度，所以一早向導演申請免落水令，當係『生日禮物』。」雖然唔使落水，不過嘉欣都做安全措拖：「我覺得一件頭嘅泳裝相對比堅尼仲難着，因為會更顯露到身形，尤其是下身高叉三角骨位，好容易走光，要好小心處理，我貼咗好多膠紙以防萬一。」

嘉欣話本來諗住同「少婦聯盟」幾個好姊妹搞一個睡衣派對，最後因為要開工搞唔成，但係佢覺得每年生日都喺工作中度過，係一件幾感恩嘅事，如果冇工開反而覺得唔自在。至於生日願望，嘉欣話：「我最希望可以安排一個family trip，不過o依家連期都未度到，所以唔知可以去邊！」

嘉欣噚晚亦都喺ig留言，佢話：「大了一歲，人成熟多了，更學懂感恩，過去一年，事業和生活都平穩渡過，少點紛擾的是非，多了對周遭踏實的體會，每一天都是辛勤學習的過程。儘管仍有廣闊的進步空間，但有機會戰戰兢兢地埋頭苦幹，始終是一件幸運的事。」講到未來嘅生活，佢話：「未來一年，願望仍有不斷的挑戰等待着我，讓支持和疼愛我的人目睹自己的努力不懈，成果或許不由我掌握，但過程流過的血汗，豐富了人生，填滿了回憶！一樣寶貴！」

最後嘉欣又話：「大家的生日祝福都收到了，每年這一天，我都感受到被滿滿的愛擁抱着，每次在辛苦工作時，給我溫暖的原動力，讓我繼續堅持，繼續進步！大了一歲，但身邊的愛，卻多了很多！」

更多娛聞，喺晒《娛果》
http://fb.com/appledailyent