「如果飲醉少少，就會有更加親密嘅行為，令到交叉感染風險增加。」林鄭一句說話，令酒吧內睇住直播嘅所有人，當堂嚇一跳，然後……都係飲返啖啤定定驚先。

就喺酒吧吧枱，中環放咗工嘅李白，本來都係諗住飲返兩杯，之後返屋企睇Netflix，聽到呢度，佢舉頭望明燈，低頭吟吟沉沉，「搞咩呢，飲大兩杯就會有親密行為，在下『舉杯邀明月，對影成三人』，咁是否指在下同月亮，加埋自己個影，有機會攬攬錫錫呢？呢個阿婆，係咪傻㗎？」對於此無稽嘅結論，李白氣憤難下，再自隊多大啖Corona beer。

「由6月到今日，就快成年，你仲問呢個問題？傻嘅似乎係你。」旁邊唔知幾時嚟咗個女仔，聲線動人，雖然戴住口罩，但以李白多年行走中環經驗，相信佢係一個靚女。「就好似啲阿媽，永遠覺得個仔上網就一定係打機，中學拍拖一定荒廢學業，後生黃絲一定係廢青，落酒吧飲酒？咁就一定係搞搞震囉。」

「此妖婦又唔夠膽令酒吧停業，學人家走精面叫酒吧禁賣酒，言下之意是否『生意係冇㗎啦，我就唔會好似英國咁，幫你出八成糧嘅！再者，我都冇逼你閂門，你可以打開門口做生意㗎，做到你咪做囉。』」林鄭嘅偉論，令到詩仙都發火，「之前着她封關，就說歧視中國人云云；今日你封殺酒吧，豈不是歧視酒精？何等愚蠢呀！」
「咁你就千萬不要低估人類嘅愚昧，就好似你手上嘅Corona咁。」
「此話何解？」
「上個月月尾，美國有間公關公司就話做咗個調查，訪問咗班飲啤酒嘅美國人，話有38%話無論如何都唔會飲Corona；之後有16%人仲話，唔肯定飲Corona同coronavirus有冇關係。」

「豈有此理，當然冇關係啦！」「你知我知大家都知，但係個報告就落結論話，coronavirus對Corona嘅銷情來講係disaster！結果個個信到十足十，仲搞到美國Corona間母公司，即係Constellation Brands個CEO，要專登出嚟澄清，話『係就係撞名，但銷情冇影響呀，2月中截數嘅話，一個月銷情仲好過上年5%！』咁證明咗一樣嘢⋯⋯」「咩呢？」

「就好似呢杯可樂咁，我今日同你講，佢唔係Corona，係Whiskey，我一個講，你唔信，我搵十個同你講，你都唔信，我搵100個、1,000個人講佢係Whiskey，你就可能會動搖了。所以，真係唔好低估人類嘅愚昧，林鄭真係有可能覺得飲酒，就等如親密行為。就正如元秋覺得蒸口罩係得一樣！」

酒過三巡，李生覺得呢個女仔非常有內涵，正想借請佢飲酒為名，一睹佢嘅芳容，「小姐，你咁有學識，不如就請你飲杯酒呢？」「唔啦，我都係啱啱飲完嘢多口同你講兩句。我要走啦。」個女仔轉身就走，此時嘅李白，飲多啖啤，又吟一句，「抽刀斷水水更流，舉杯消愁愁更愁。可惜，林鄭嘅『飲酒致親密行為』偉論唔係真理。」

by千頌C@堆填區
http://fb.com/winbigwok
----------------------------
【武漢肺炎】專頁
全民自救 抗疫資訊盡在《蘋果》
-----------------------
屬於香港人的移民攻略
立即登入【全球樓行】
Dream House零距離