港交所（388）每年中都搞上市周年酒會，今年嚟到第18個年頭，適逢新主席史美倫上任，政府又換咗屆，可能新人事新作風，一改往年喺金鐘五星級酒店舉行嘅慣例，今年首次返去港交所主場「金融大會堂」度搞。咁又係，個場裝修之後，容納到700人咁多，又有貝字牆散發藝術感，無謂再益酒店喇。

三個第一次

咁數落，下星期三晚嘅酒會，似乎有三個第一次。首先，係史美倫第一次以主席身份出席；又將會係林鄭月娥第一次以行政長官身份赴會；地點又第一次喺自己主場搞，值得期待喎，唔知到時有冇特別節目呢？
講開又講，噚日香港掛上今年第一個風球，醒起港交所舊年上市周年酒會，直情係8號風球吹到應一應，但港交所都堅持如期進行，希望今年咁多位財金猛人唔使咁頻撲喇。
講到以往咁多年周年酒會，最令人難忘嘅，相信係12周年時，港交所公佈以167億元天價買LME，不過行政總裁李小加此後都多番強調，交易所並非以併購定位嘅公司，相信就難少少再有大刁消息出現喇。
除咗上市周年酒會，港交所下星期二又搞辦人民幣定息及存款論壇，請來各大銀行同指數商講講北向債券通嘅政策突破，李小加要連踩兩日大活動，熊貓眼又要走出來了。

李華華
mailto:[email protected]