多個發展商近期狂谷新盤，令到一手市場稍為生猛，唔少城中名人、富豪伺機入市。和黃（013）大班霍建寧太太霍何綺華最近就向陸恭蕙嘅堂兄陸恭正，以6,655.2萬元，買入灣仔會景閣一個高層海景單位。
霍太買入呢個單位成40幾樓高，仲要單邊有海景，實用面積1,400呎，實呎6.75萬元，都算好價。
呢個單位原本係陸恭蕙嘅堂兄陸恭正持有，早排放售一籃子八個單位，聽聞已經賣出幾間，霍太係其中一個買家。代理講，呢類海景單位，呎租60至70元，回報率都有2厘幾。
霍建寧家住深水灣道大宅，霍太買磚頭應該都係投資之用，聞說，佢早年亦有投資中半山帝景園。霍太曾患乳癌，𠵱家係香港乳癌基金會主席，近年積極幫助患者同教大眾防癌。

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange