今年兩台「選美激戰」爆發，無綫港姐首輪現身佳麗遭大起底，早前輪到ViuTV選美節目《美選D.n.A.》參賽者去柴灣進行面試，質素有如大會主題Devil（魔鬼）與Angel（天使）結集，今日ViuTV又有面試，一眾佳麗亦分批入去。

笑容OK甜美嘅28歲長髮女Happy上星期先參加完健美小姐，身形瘦削，但睇得到全身「肌感」，佢都自言身形比較大隻，對比之下有啲肌肉，佢又話現時好多女仔都有自己個性，認為「選美」唔一定好瘦、好女仔、好小鳥伊人先有吸引力，Happy認為有個性都係特別。

言談開朗嘅Happy曾獲三屆健美小姐冠軍，去過香港、新加坡，嚟緊下周就去廣州比賽，問佢參加ViuTV選美面試有咩準備，Happy講：「佢冇同我講，(上嚟傾吓偈）係呀！除都得嘅，我哋比賽都係要著比堅尼，（你唔介意性感）適當嘅，我哋呢啲健康性感。」

此外，嚟緊20歲嘅SaSa剛考完DSE等放榜，兼係女子組合HGOINFINITY成員，佢都有興趣嚟試一試，佢所屬嘅新人組合有十幾個成員，聲稱今年就會出新歌，講到佢今次參加選美會唔會同你工作有啲抵觸，SaSa直言：「唔會，我哋都係一個多元化女子組合，我都想展示唔同嘅一面俾大家睇吓。」今次係由經理人陪佢嚟參選。