天后鄭秀文（Sammi）嘅父母近日相繼生病，日前佢喺Ig貼長文提到媽咪「生蛇」後，前日又再出post，話年老嘅父母身體好弱，佢話媽咪生蛇仲未好，痛到瞓唔着，周日就輪到爸爸唔舒服，佢就送咗爸爸去醫院睇症兼做檢查，好彩份報告係正常。

雖然父母都病咗，但Sammi自勉話要用正能量去面對：「mi不會輕言陷入悲觀，生命本是不斷經歷和學習，年壯的保護老弱，生命就是如此在愛和磨練中生生不息。」佢又感恩一家人共同面對，仲呼籲大家要珍惜年紀大嘅父母：「父母一直無條件的去養育愛護子女，現在父母老了，需要我們，我們就要盡全心去照顧父母。而且我們有五姊弟，一直都能彼此肩負不同的責任，凡事有商有量，很好了，感激姊姊們和弟弟。」

不要感沮喪灰心

Sammi希望大家嘗試站喺年紀大嘅父母角度，明白佢哋唔只身體差，心靈都好需要仔女陪住，呢種亦係親子時間：「鼓勵各位身為子女的，面對年老患病父母親，不要感覺沮喪灰心，生命是需要彼此扶持的，愛是力量！我們將來也會有年老身體虛弱的一天，現在多嘗試站在年邁父母的角度去設想他們的需要。」Sammi不停提示「愛也是一種靈藥」，好多網民都好有愛，除咗祝佢父母早日康復，仲留言：「神給你時間，要你多陪陪他們。」
撰文：馮仁昭